تستاهلين الحب

تستاهلـيـن الـشـوق يابلـسـم الـشــوق
تستاهلـيـن الـشـوق ياغـلـى عشـيـقـه

ياقمـة الاحسـاس والصـدق والــذوق
يــاشــاعــره يـافـاتــنــه يـارشـيــقــه

برفـوق لارحتـي عـن القلـب برفـوق
مـثـل النـحـل لاراح يجـمـع رحـيـقـه

الصمت بشفاهك على العيـن منطـوق
والجفـن غافـي رمـش عينـي يفيقـه !

برفـوق دمـعـك لاتنـثـر مــن الـمـوق
الحـزن مالـح والحلـى حــول ريـقـه

من حد شمسـك لاشرقـت حبنـا فـوق
ونـور القمـر مـن هـو بـيـده يعيـقـه ؟

مجنـون مـن يـغـرس بيـديـه زمـلـوق
فـي حـروة أغصونـه عساهـا وريقـه

نهرك بروحي ياكحل الطرف مدفوق
وهجـرك لبـو .......... تــرى مايطيـقـه

ولا يـهـزك قــول حـاقـد ومصـفـوق
حـنـا بجـنـه والحـسـد فـــي حـريـقـه

أهل الحسد والكذب والغـدر والبـوق
عـازب وعـانـس أو طلـيـق وطليـقـه

عهـدي معـك يـاقـرة العـيـن مـوثـوق
وعهـود حـبـك فــي خفـوقـي وثيـقـه

تستاهليـن الحـب والعـشـق والـشـوق
تستاهلـيـن الـعـمـر يـاغـلـى عشـيـقـه